چینی صدر شی جن پنگ امریکی دورے میں صدر ٹرمپ سے اہم ملاقات کریں گے

چین کے صدر شی جن پنگ رواں ہفتے امریکا کا سرکاری دورہ کریں گے جہاں وہ امریکی صدر ڈونلڈ ٹرمپ سے ملاقات کریں گے۔ چینی وزارت خارجہ کے مطابق شی جن پنگ 23 سے 25 ستمبر تک امریکا میں رہیں گے۔ چینی وزارت خارجہ کے ترجمان گو جیاآن کے مطابق دونوں رہنما چین اور امریکا کے تعلقات، عالمی امن اور ترقی سمیت اہم عالمی معاملات پر تفصیلی تبادلہ خیال کریں گے۔ یہ دورہ ایسے وقت میں ہو رہا ہے جب ایران جنگ کے باعث عالمی سطح پر کشیدگی میں اضافہ ہوا ہے۔ امریکی صدر ڈونلڈ ٹرمپ نے بھی کہا ہے کہ وہ شی جن پنگ کے ساتھ تقریباً ہر اہم معاملے پر بات کریں گے۔ دونوں ممالک کے درمیان تجارت، ٹیکنالوجی، مصنوعی ذہانت اور دیگر اسٹریٹجک معاملات بھی مذاکرات کا حصہ بن سکتے ہیں۔ چینی حکام کا کہنا ہے کہ بیجنگ امریکا کے ساتھ مذاکرات اور تعاون بڑھانے، اختلافات کو مناسب انداز میں سنبھالنے اور دونوں ممالک کے درمیان تعلقات میں استحکام پیدا کرنے کا خواہاں ہے۔ یہ دونوں رہنماؤں کی چھ ماہ کے دوران دوسری باہمی ملاقات ہوگی۔