اسرائیلی میڈیا کے مطابق بدھ کو دبئی سے تل ابیب جانے والے فلائی دبئی کے مسافر طیارے میں دوران پرواز ایک پائلٹ کی اپنے ساتھی پائلٹ سے ہاتھا پائی ہو گئی، جس کے نتیجے میں ایک پائلٹ کو چاقو کے وار سے متعدد زخم آئے۔

فلائی دبئی کی پرواز FZ1073 نے مقامی وقت کے مطابق صبح تقریباً 9 بجے  7700 سکواک کوڈ جاری کیا، جو طیارے میں ہنگامی صورت حال کی نشاندہی کرتا ہے، جس کے بعد سکیورٹی نظام الرٹ ہوگئے۔

چند منٹ بعد پائلٹ نے 7500 کوڈ فعال کیا، جو طیارہ ہائی جیک ہونے کی علامت سمجھا جاتا ہے۔

تقریباً 20 منٹ بعد اسرائیلی وزیراعظم اور وزیر دفاع نے سکیورٹی اجلاس منعقد کیا، کیونکہ طیارے کے ہائی جیک ہونے کا خدشہ بڑھ گیا تھا۔

بعد ازاں اطلاع ملی کہ طیارے کا رخ سعودی عرب کی جانب موڑ دیا گیا ہے اور دو اسرائیلی جنگی طیارے بھی اس کے ہمراہ ہیں۔
دونوں پائلٹس کے درمیان لڑائی کی وجہ تاحال واضح نہیں ہوسکی۔

 تاہم اسرائیلی میڈیا نے مسافروں کے حوالے سے بتایا کہ کاک پٹ میں ’بڑی مقدار میں خون‘ موجود تھا۔

صبح تقریباً 9:45 بجے طیارہ سعودی عرب کے تبوک ایئرپورٹ پر بحفاظت لینڈ کرگیا، جہاں پائلٹ سے پوچھ گچھ کی گئی۔

فلائی دبئی نے ایک بیان میں واقعے کی تصدیق کرتے ہوئے کہا کہ 30 ستمبر کو دبئی انٹرنیشنل ایئرپورٹ سے بن گوریون انٹرنیشنل ایئرپورٹ جانے والی پرواز FZ1073 کو دورانِ پرواز ایک واقعہ پیش آیا۔

کمپنی کے مطابق طیارہ بحفاظت تبوک ایئرپورٹ پر اتر گیا اور تمام مسافر محفوظ ہیں جبکہ ان کی حاضری بھی مکمل کرلی گئی ہے۔

خبر رساں ایجنسی روئٹرز کے مطابق اسرائیلی حکومت کا خیال ہے کہ متحدہ عرب امارات سے اسرائیل جانے والی ایک پرواز میں پیش آنے والا واقعہ ممکنہ طور پر ایک پائلٹ کی جانب سے کیا جانے والا ’دہشت گرد حملے کی کوشش‘ تھا۔ 

بدھ کو ہنگامی سگنل جاری کیے جانے کے بعد طیارے کا رخ سعودی عرب کی جانب موڑ دیا گیا تھا۔ یہ بات دو اسرائیلی حکام نے بتائی۔

دونوں اسرائیلی حکام کے مطابق خیال کیا جا رہا ہے کہ کو پائلٹ نے کپتان کو چاقو مارا، جس کے بعد کیبن عملہ کاک پٹ میں داخل ہوا اور طیارے کا کنٹرول سنبھال لیا۔

اس سے قبل ایک اسرائیلی عہدیدار نے روئٹرز کو بتایا تھا کہ دونوں پائلٹس کے درمیان جسمانی جھگڑے کے بعد طیارے سے ہنگامی سگنل جاری کیے گئے تھے۔

طیارے کے سعودی عرب میں اترنے کے وقت اسرائیلی وزیراعظم کے دفتر کے ترجمان ڈوروناسپیل مین نے روئٹرز کو بتایا کہ واقعے کو ہائی جیکنگ نہیں سمجھا جا رہا بلکہ یہ ’ایک مختلف نوعیت کا واقعہ‘ ہے۔ 

بعد میں جب ان سے پوچھا گیا کہ آیا اسرائیل اسے دہشت گردی کا واقعہ سمجھ رہا ہے تو انہوں نے فوری طور پر کوئی جواب نہیں دیا۔

نام ظاہر نہ کرنے کی شرط پر صحافیوں کو بریفنگ دینے والے دونوں اسرائیلی حکام نے کہا کہ اسرائیل کا موجودہ جائزہ یہ ہے کہ یہ واقعہ ’دہشت گرد حملے کی کوشش‘ تھا اور اس کا تعلق دونوں پائلٹس میں سے کسی کی ذہنی صحت سے متعلق مسئلے سے نہیں تھا۔

اسرائیلی میڈیا میں بڑے پیمانے پر نشر ہونے والی ایک ویڈیو میں، جسے طیارے میں سوار ایک اسرائیلی مسافر کی ویڈیو قرار دیا جا رہا ہے، مسافر نے بتایا کہ ایک پائلٹ شدید زخمی جبکہ دوسرا معمولی زخمی ہوا تھا اور ایک پائلٹ کو چاقو مارا گیا تھا۔

سعودی عرب کے تبوک ایئرپورٹ، جہاں طیارے نے بحفاظت لینڈ کیا، نے بتایا کہ دونوں پائلٹس کو زخمی حالت میں ہسپتال منتقل کیا گیا۔ تاہم ایئرپورٹ انتظامیہ یا مذکورہ مسافر نے حملہ کرنے والے شخص کی شناخت نہیں بتائی۔

فلائی دبئی کی پرواز FZ1073 دبئی سے تل ابیب جاتے ہوئے اردن کی فضائی حدود کے اوپر تھی جب اسے سعودی عرب کی جانب موڑ دیا گیا۔

 پروازوں کی نگرانی کرنے والی ویب سائٹ Flightradar24 کے مطابق طیارے نے پہلے عمومی ہنگامی سگنل اور اس کے بعد ایسا ہنگامی سگنل جاری کیا جو ممکنہ غیر قانونی مداخلت کی نشاندہی کرتا ہے۔

ویب سائٹ کے مطابق بوئنگ 737 طیارے، جس میں اسرائیلی میڈیا کے مطابق تقریباً 150 اسرائیلی مسافر سوار تھے، نے بعد میں دوبارہ عمومی ہنگامی سگنل جاری کیا اور پھر شمال مغربی سعودی عرب کے تبوک ایئرپورٹ پر لینڈ کیا۔

ویب سائٹ Flightradar24 کے مطابق طیارے کے ڈیٹا سے ظاہر ہوتا ہے کہ پہلے ہنگامی سگنل سے کچھ دیر قبل طیارہ 30  سیکنڈ سے بھی کم وقت میں اچانک تقریباً 14 ہزار فٹ نیچے آیا۔ تاہم فوری طور پر یہ واضح نہیں ہوسکا کہ ہنگامی سگنل کس نے جاری کیے تھے۔

فلائی دبئی کا کہنا ہے کہ کمپنی کی ٹیمیں متعلقہ حکام کے ساتھ مل کر کام کر رہی ہیں اور مزید تصدیق شدہ معلومات دستیاب ہونے پر آگاہ کیا جائے گا۔

سعودی عرب کے پرنس سلطان بن عبدالعزیز انٹرنیشنل ایئرپورٹ نے بتایا ہے کہ فلائی دبئی کی پرواز FZ1073 نے ہنگامی صورت حال کے باعث سعودی عرب میں لینڈنگ کی، جہاں دونوں پائلٹس زخمی حالت میں پائے گئے اور انہیں فوری طور پر ہسپتال منتقل کر دیا گیا۔

ایئرپورٹ کی جانب سے جاری نوٹس کے مطابق 30 ستمبر کو مقامی وقت کے مطابق صبح 8 بج کر 44 منٹ پر ایئر ٹریفک کنٹرول یونٹ نے پرواز کی جانب سے ہنگامی لینڈنگ کی درخواست موصول ہونے کی اطلاع دی۔

ایئرپورٹ انتظامیہ نے طیارے کی مدد کے لیے طے شدہ پروٹوکول کے تحت ہنگامی ردعمل کا مناسب درجہ نافذ کیا۔

نوٹس کے مطابق پرواز صبح 9 بج کر 45 منٹ پر بحفاظت ایئرپورٹ پر اتر گئی، جس کے بعد معلوم ہوا کہ طیارے کے کپتان اور فرسٹ آفیسر زخمی ہیں۔ دونوں کو ضروری طبی امداد کے لیے فوری طور پر ہسپتال منتقل کر دیا گیا۔

ایئرپورٹ انتظامیہ کے مطابق مسافروں کو ٹرمینل پر ضروری سہولیات اور معاونت فراہم کی گئی، جبکہ فلائی دبئی کے ساتھ متبادل طیارے کے انتظام کے لیے رابطہ جاری ہے۔

ایئرپورٹ نے مزید کہا کہ متعلقہ حکام واقعے کی ضروری تحقیقات کر رہے ہیں۔