انڈیا میڈیا کی رپورٹس کے مطابق بالی وڈ اداکار وشوناتھ پاٹیکر، جنہیں دنیا نانا پاٹیکر کے نام سے جانتی ہے، 75 برس کی عمر میں گوا میں اپنی رہائش گاہ پر دل کا دورہ پڑنے کے بعد جمعرات کو انتقال کر گئے۔

انڈین خبر رساں ادارے اے این آئی کے مطابق نانا پاٹیکر کو گھر میں دل کا دورہ پڑا اور انہیں مقامی وقت کے مطابق صبح 5 بجکر 20 منٹ پر مردہ قرار دیا گیا۔

منی پال ہسپتال کے شعبۂ سرطان کے سربراہ  ڈاکٹر شیکھر سالکر نے اے این آئی کو بتایا: ’45 منٹ تک مسلسل سی پی آر کرنے کے باوجود انہیں بچایا نہیں جا سکا۔‘

انہوں نے مزید بتایا کہ قانونی و طبی مقدمہ درج کر لیا گیا ہے اور پوسٹ مارٹم کیا جائے گا۔

نانا پاٹیکر نے ہندی اور مراٹھی سینیما کی متعدد فلموں میں اداکاری کی، جبکہ تمل اور کنڑ فلموں میں بھی چند کردار ادا کیے۔

 ان کے 48 سالہ فلمی کیریئر کا آغاز 1978 میں ریلیز ہونے والی فلم ’گمن‘ سے ہوا۔

بعد ازاں انہوں نے میرا نائر کی آسکر کے لیے نامزد فلم ’سلام بمبئی!‘ میں بھی اداکاری کی اور 3 قومی اعزازات جیتے۔

انہیں ’پرندہ‘ اور ’اگنی ساکشی‘ کے لیے بہترین معاون اداکار جبکہ ’کرانتی ویر‘ کے لیے بہترین اداکار کا قومی اعزاز دیا گیا۔

نانا پاٹیکر کو 2013 میں انڈیا کے چوتھے سب سے بڑے سول اعزاز پدم شری سے بھی نوازا گیا۔

2007  کی مزاحیہ فلم ’ویلکم‘ میں گینگسٹر ادے شیٹی کا کردار ادا کرنے پر انہیں نوجوان مداحوں میں بھی وسیع پذیرائی ملی۔

نانا پاٹیکر کی موت پر بالی وڈ سمیت دیگر شعبہ ہائے زندگی سے تعلق رکھنے والے افراد نے دکھ اور افسوس کا اظہار کیا ہے۔