پرتگال کے معروف فٹ بالر کرسٹیانو رونالڈو نے جمعرات کو انٹرنیشنل فٹ بال سے ریٹائرمنٹ کا اعلان کر دیا۔

41  سالہ رونالڈو نے پرتگال کی جانب سے 234 میچز کھیلے اور 146 گول سکور کیے۔

گذشتہ ماہ نیشنز لیگ کے ایک میچ میں قومی ٹیم کے کوچ جورجے ژیزس کی جانب سے انہیں کھلانے سے انکار پر دونوں کے درمیان اختلافات پیدا ہوگئے تھے، جس کے بعد رونالڈو فوری طور پر ٹیم کا کیمپ چھوڑ کر چلے گئے تھے۔

رونالڈو نے اپنے انسٹاگرام اکاؤنٹ پر ایک ویڈیو میں کہا کہ ’پرتگال کے عوام، وہ وقت آگیا ہے کہ میں قومی ٹیم کی 7 نمبر کی شرٹ واپس کر دوں۔‘

انہوں نے مزید کہا کہ ’میں نے کبھی یہ نہیں سمجھا کہ یہ شرٹ صرف میری ہے، لیکن 23 برس تک اسے پہننے، اس کا دفاع کرنے اور دنیا بھر کے سٹیڈیمز میں اسے اپنے ساتھ لے جانے کا اعزاز اور ذمہ داری مجھے حاصل رہی۔‘

اگرچہ یہ افواہیں گردش کر رہی تھیں کہ کرسٹیانو رونالڈو بین الاقوامی فٹ بال میں اپنے ملک کی نمائندگی کے لیے دوبارہ میدان میں اترنے کا ارادہ رکھتے ہیں، تاہم جمعرات کو پانچ مرتبہ بیلن ڈی اور ایوارڈ جیتنے والے پرتگالی سٹار نے اپنے انسٹاگرام اکاؤنٹ پر ایک ویڈیو جاری کی، جس میں انہوں نے بین الاقوامی فٹ بال سے ریٹائرمنٹ کا اعلان کیا۔

رونالڈو نے اپنے کیریئر کی جھلکیاں دکھانے والی ویڈیو میں کہا کہ ’اب وقت آ گیا ہے کہ یہ شرٹ آنے والی نسل کے حوالے کر دوں۔ یہ فیصلہ آسان نہیں تھا، کیونکہ بعض فیصلے صرف دماغ سے نہیں بلکہ دل سے بھی کیے جاتے ہیں۔‘

انہوں نے مزید کہا کہ ’اگست 2003 میں شروع ہونے والا یہ سفر، جس نے میری زندگی ہمیشہ کے لیے بدل دی، اب اختتام کو پہنچ گیا ہے۔‘

رونالڈو کے بین الاقوامی کیریئر کا سب سے بڑا اعزاز 2016 میں فرانس میں پرتگال کو یورپی چیمپیئن شپ جتوانا تھا، تاہم فائنل کے دوران انجری کے باعث انہیں میدان چھوڑنا پڑا تھا۔

اس سال امریکہ، کینیڈا اور میکسیکو میں ہونے والے ورلڈ کپ میں رونالڈو نے تین گول کیے، تاہم پرتگال کی ٹیم راؤنڈ آف 16 میں ایونٹ کی فاتح سپین کے ہاتھوں شکست کھا کر باہر ہوگئی۔